مجلة ملتقى الشعراء والأدباء..طعم الذكريات.. بقلم المتألق عادل عبد الرازق

طعم الذكريات

-----------

بقلمي / عادل عبد الرازق

--------------------

طعم الحاجات ذكريات

طعم الذكريات سكات

يا قلبي نادم عاللي كان

يا قلبي آسف عاللي فات

...

أنا قلبي حبك حب موت

أنا قلبي عشقك عشق موت

لكنك انتي رفضتيني

صدّتيني وهدّتيني

ورمتيني على ركن الحارات

طعم الحاجات ذكريات

طعم الذكريات سكات

...

ماعرفش ليه ما فهمتكيش

ما عرفش ليه ما فهمتنيش

وكأن قلبك ما حبنيش

وكأن أنا ما عرفتكيش

إتقابلنا في المواني

وافترقنا في المواني

ولمّا نزلنا البحر نسبح

مالقيناش غير الدوّامات

طعم الحاجات ذكريات

طعم الذكريات سكات

...

يكفيكي إنك تشوفي

في عيوني دايماً دمعتي

يكفيكي لوني وحروفي

اللي عاشقين غربتي

في دروب مل بتطرّح

غير الشوك اللي بيجرّح

ويفرق ما بيني وبينك

في كل خطوة مسافات

طعم الحاجات ذكريات

طعم الذكريات سكات

...

طعم الذكريات في قلبي

وفي ملامحي وفوق لساني

مالح وجارح وممرّر

في شفايفي حتى الأغاني

كان ليه اتقابلنا من البداية

وكان ليه افترقنا في النهاية

ما دمنا كنا عكس بعض

ما دمنا كنا حارة سدّ

وميت سؤال مالهومش رد

زي العجايب والمستحيلات

طعم الحاجات ذكريات

طعم الذكريات سكات

مفيش مابينا غير الذكريات

ولا عادش بينا غير السكات

[
](https://www.facebook.com/photo.php?fbid=1320257914806035&set=gm.837361519998637&type=3&eid=ARDQ3xpjMYfoE06ptZD_QrKQ9YdrenvoE_bouIT1ToeEdk_LwzJ0LcFBb24qV0i1PwB6ShUaTFThcAil&ifg=1)