مجلة ملتقى الشعراء والأدباء // صوت الحب// بقلم الشاعرة المتالقة مريم كباش

** صوت الحُبّ :
===========
هالدّني .. ربي بناها بحكمتو
وقلّو : ياإنسان ..!
إنت صورة الإله ... بدنيتو
ازرعوا ياناس السّلام
بكل دربْ
كان البشر يعبدوا ربنا
عا تعاليم محبتو
ماكان في كنيسه ... ولا جراسْ
ماكان فيه مآذن ... ولا حرّاسْ
ماكان فيه طوائف تفرّق النّاس
والنّور يظلل علينا
من جناين رحمتو
باسم الرَّبْ
" عيسى " .. ال نادى بالسّلام بكلمتو
" ومُحَمّد " زرع فينا الخير لّتّْزّهِرْ فينا زرعتو
وربنا قال أنّو المحبة مفتاح ل جنّتو
كل البشر باسم الحبّ صَلِّتْ َو نَدْهِتو
يارب .. اسمك رحمة .. وحُبْ
وعا اسم المحبِّهْ صارت هالدِّني قمح وبساتين
وكروم خير وسنابل أمل ..وأحلام ورياحين
وقناديل تضوي قلوب النّاس الصادقين
كل البشر عرفوا أنو العبادة حب بيقين
وعاشوا بسلام وفهموا شو يعني الرّبْ
شو غيّر هالحال ... وشو غيّر طعم الدِّني ؟؟!
شرد الإنسان عن المبادي الحلوه بولدَنِهْ
لعبت ب راسو وقلبو نزوات الشَّيْطّنِهْ
وبين جرس كنيسه .. وتكبيرة مَيْدَنِهْ
سرقوا من الدين .. المعنى الغني
قتلوا الحب ... وجرحوا العمر الهَني
وباسم الرّبْ عملوا حربْ
وزرعوا دموع ... وقهر بالقلبْ
"عيسى "... و"محمد" ... نادوا : رحمتك يارب
شو حرّفوا شرع المحبة .. واتبعوا الوسواس
ارجعوا للتسامح .. والتآخي .... ياناس
هِي المبادي السّاميه ... وهي الشّرع الأساسْ
لا تقتلوا بالتعصب الأعمى السّلام
تعالوا نصلّي عا صوت الحبّ
لترجع فينا الحياة .. وتعمر هالدّني .

**
ريحانة الشام : مريم كباش