يا شمسي غيبي
ومتجليش إلا وفي ايدك حبيبتي
الي حبها بيجري في وريدي
مهو مش بايدي
اعيش بعيد عنها ....... ومنها
كل فتلة بتتغزل تنسجلي عيدي
يا شمسي غيبي
حايليها لاجل مقلبها يحن ليا
واحكيلها علي نار الفراق
وعذابي من الم اشتياق
علي الجرح والي ياما عمله فيا
حايليها يمكن قلبها
يرق في لحظة اشتياقها لابنها
ويحس بيا
وان كان عليا
مسامحها علي كل الي فات
علي رميتي في وحدتي في حضن البعاد
علي دمعتي الي ياما قلبي نزفها بالساعات
بس هيا ........ تحن ليا
تشاورلي بعنيها البهيه
والله لارجع ليها راضي من سكات
وحشني اسمع منها كلمة حبيبي
يا شمسي غيبي
بسرعة روحي وطبطبي علي قلبها
مهو مش داري بي
عمال بيقسي وكل لحظه في القسيه
يزيد في قلبي حبها
وان لمحتي عنيها مشتاقه وانتي عندها
بلغيني بسرعه لاجل ما يبرد لهيبي
يا شمسي غيبي
حلفيها بكل ايامنا واحنا صغيرين
بالثواني والدقايق والساعات
حتي السنين
بلاش تزوود الأشتياق
دي انا لسه فاكر كل كلمه
طالعه منها وقت الفراق
مهما كان البعد والشوق والعذاب
مهما تاه القلب في دروب الضباب
مش هلاقي الا حضنك يحتويني
مش هلاقي غير ملامح ضحكتك
تروي في سنيني
والقلب تايه ودليلة
إني الاقيك وتلاقيني
وحشاني يا قدري ونصيبي
يا شمسي غيبي
امضاء : نمر الشرق
Aucun commentaire:
Enregistrer un commentaire