"تغيير اللهجة "
شحال من واحد
كيظن مع راسو
صافي كبر
وصبح عملاق
ويقدر
للكل يصارع
للحلبة كيصعد
بالمظهر
كيخلع
وكيظن يقدر
يهاجم
وحتى على راسو
ما قدر
يدافع
وهو يتلقى التلاكم
وكيقول مع نفسو
راه عايق
وفايق
وعليه المعاني ما تمر
وهو غير كيزيد
يتقزم
قدام الناس
اصحاب
التجارب
الي منها كتصدر
الحكايم
وشحال من واحد
ما زال صغير
ولما كيهضر
كلامو كيضر
البعض
وللبعض يكسر
الضلوع
والظهر
وللراس الصلب
يقدر يفلق
ولكن !!!!!
كيحشم
وكيوزن
قبل مايتكلم
أو ينظم
غير عمل
مزيان
بديك النية
تلقى الله
شحال من واحد
مات صغير
وربي بغاه
حيث صغير
كيتواضع
مع الناس
وما يدفع
كبير
وهو هرم
بعمق التفكير
والعلم
بالبرهان
والدليل
ماشي بعلم
الغيب
والتنجيم
والتنمنيم
وشحال من واحد
كيحسب مع راسو
وكيشيط ليه
حتى كبر
وهو مازال
في بحور الشر
كيعوم
حتى غرق
وربي نساه
ولما نزل
للقاع
وبدا كيتلطم
مع الحجر
والرمل
عاد بدا كيفرق
بين !!!!!
شكون اباه
وشكون مولاه
وشكون امو
وشكون لالاه
بقلمي : أحمد بنادي
Aucun commentaire:
Enregistrer un commentaire