مجلة ملتقى الشعراء والأدباء // انا عصفورة // بقلم الشاعرة المتالقة مريم كباش

** أنا عصفورة :
==========
أنا عصفورة حلوة صغيرةْ
عم أحلم بالهوى والنُّورْ
عم أحلم بالهوى والنُّورْ
أحلامي كانت كبيرةْ
فضائي محبةْ وسرورْ
فضائي محبةْ وسرورْ
سرقوا آمالي وحياتي
عاخدودي نزلت دمعاتي
مجروحة وقلبي مقهورْ
مجروحة وقلبي مقهورْ
من إجرامن حلمي تبخرْ
من إرهابن قلبي تكسرْ
مابقدر طير وعلِّي
وجناحي والله مكسورْ
وجناحي والله مكسورْ
دبلتْ عالغصن حكاياتي
وغنيَّاتي وتغريداتي
ويلي نتفولي ريشاتي
مااهتمُّوا بدمِّي المهدورْ
مااهتمُّوا بدمِّي المهدورْ
لعبت فينا أيادي خطيرِةْ
حبسونا بحيطان كبيرِةْ
بلدي تشعل نار وحيرةْ
وبحزني عم لفّ ودورْ
وبحزني عم لف ودورْ
بأخبارن أنا صرت الرسمةْ
دموعي بعيوني مرتسمةْ
ولو عاشفافي لمحوا بسمةْ
رفعوا وعلُّوا حولي السُّورْ
رفعوا وعلُّوا حولي السُّورْ
أنا عصفورة شام تنادي
سورية بعبدها عبادةْ
ومهما يكيدوا هالأعادي
رح غنّي للنّصر بحورْ
رح غنّي للنَّصر بحورْ
عصفورة وعندي أحلامي
ولو زاد الحزن وآلامي
رح طير وغنّي سلامي
سوريّة يا أمّ النّورْ
سوريَّة يا أمّ النّورْ
**
ريحانة الشام : مريم كباش